ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐՈՒԹՅՈՒՆ

Գաբրիել Ղազարյանն աշխատանքային այցով եղել է Լոռու մարզում

12 մարտ 2019
ՀՀ սպորտի և երիտասարդության հարցերի նախարարի 1-ին տեղակալ, նախարարի ժամանակավոր պաշտոնակատար Գաբրիել Ղազարյանը երեկ աշխատանքային այցով եղել է ՀՀ Լոռու մարզում, այցելել է մարզում գործող նախարարության ենթակայության Վանաձորի բռնցքամարտի մանկապատանեկան մարզադպրոց և Սպիտակի մանկապատանեկան համալիր մարզադպրոց: 

Գաբրիել Ղազարյանը մարզադպրոցների տնօրենության և աշխատակիցների հետ քննարկել է հրատապ լուծում պահանջող բազմաթիվ հարցեր, ծանոթացել է մարզակառույցների շենքային և գույքային պայմաններին: 

Հետևելով Վանաձորի բռնցքամարտի մանկապատանեկան մարզադպրոցում ընթացող մարզումներին՝ Գ. Ղազարյանը կարևորել է մարզադպրոցի տնօրենության աշխատանքը, որն իր միջոցներով մեծածավալ շինարարական աշխատանքներ է իրականացրել, այդ թվում նաև վերանորոգել է բռնցքամարտի ռինգը՝ մարզադպրոցի սաների համար ստեղծելով մարզումների լավ պայմաններ: 

Արձանագրվել է, որ ի տարբերություն Վանաձորի բռնցքամարտի մանկապատանեկան մարզադպրոցի՝ Սպիտակի մանկապատանեկան համալիր մարզադպրոցի շենքային պայմաններն ավելի գոհացուցիչ են, ինչը հնարավորություն է տվել այդ մարզադպրոցում ավելացնելու մարզաձևերի քանակը և ակտիվացնելու մարզական կյանքը Սպիտակ քաղաքում: 

«Աշխատանքային այցը արդյունավետ էր: Հանդիպումների և քննարկումների արդյունքների ամփոփումից հետո կմտածենք մարզադպրոցների խնդիրներին լուծում տալու տարբերակներ գտնելու ուղղությամբ: Վանաձոր և Սպիտակ կատարած այցի ընթացքում վերհանվեցին նաև հաշմանդամային սպորտին առնչվող հարցեր: Նախարարությունը նախատեսում է հանդես գալ օրենսդրական նախաձեռնությամբ՝ հաշմանդամային սպորտի այդ հիմնախնդիրներին լուծում տալու նպատակով»,- տեղեկացրել է Գ. Ղազարյանը:

Լոռի կատարած այցի ընթացքում Գաբրիել Ղազարյանին ուղեկցել է նախարարության մարզական կազմակերպությունների և մանկապատանեկան սպորտի քաղաքականության վարչության պետ Վաղինակ Գալուստյանը: Մոտ օրերս նախատեսվում է Գ. Ղազարյանի և Վ. Գալուստյանի այցը նաև ՀՀ Սյունիքի մարզի մարզադպրոցեր:
Ետ գնալ